الثلاثاء 24/يونيو/2025 - 10:35 م

أضف للمفضلة

شارك شارك

أصدر حمزة علاء حارس مرمى الأهلي السابق بيانًا رسميًا، عبر حسابه الرسمي على موقع التواصل الاجتماعي فيسبوك.

بيان حمزة علاء

وقال حمزة علاء: أكيد الكلام جاي متأخر، وعشان كده حابب أعتذر.. من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم جوه النادي الأهلي، وقرار الرحيل كان صعب، بس كان لازم أفكر في مستقبلي، يمكن الفرصة مجتش زي ما كنت بتمنى، بس كل حاجة بتحصل بيبقى ربنا سبحانه وتعالى كاتبها، ورب الخير لا يأتي إلا بالخير. 

وأضاف حمزة علاء: لجمهور النادي الأهلي العظيم، محبتكم وتقديركم عمرهم ما كانوا مرتبطين بعدد الدقايق اللي لعبتها، دايمًا كنتوا سند في كل لحظة، في كل بطولة، حسيت معاكم إني أحسن حارس في العالم، وأنا بلعب في بطولة إفريقيا والأولمبياد، كل اللي بطلبه، إنكم تفضلوا فاكرين إني كنت واحد منكم، ابن من أبناء النادي الأهلي.

وواصل حارس الأهلي السابق: إلى إدارة النادي بقيادة الكابتن محمود الخطيب، شكرًا على كل لحظة حسيت فيها إني جزء من الكيان، لزمايلي، إنتوا إخواتي وعيلتي اللي عمري ما هنسى أيامها وبتمنى ليكم كل التوفيق والنجاح، ولكل مدرب اتمرنت معاه داخل النادي، شكرًا من كل قلبي على كل لحظة دعمتوني فيها أو علمتوني فيها حاجة، ولكل عامل تشرفت بالشغل معاه، أنتم عارفين ‏معزتكم عندي.

واختتم حمزة علاء بيانه: ولشعب الأهلي، هفضل دايمًا مشجع للكيان، من قلب التالتة شمال، ويارب أرفع راسكم، وأكون عند حسن ظنكم في خطوتي الجاية، وتكونوا ‏دايمًا في ضهري وسند ليا زي ما طول عمركم عودتوني، أشوف وشكم على خير.. ابنكم حمزة علاء.