الجمعة 27/يونيو/2025 - 10:17 م

أضف للمفضلة

شارك شارك

أعربت وزارة الأوقاف عن استنكارها لعدد من التصرفات التي يرتكبها عدد من سائقي السيارات، التي تتسبب في تعريض حياتهم والركاب للخطر، وذلك عقب مصرع 19 شخصًا إثر حادث تصادم على الطريق الإقليمي بالمنوفية.

الأوقاف بعد حادث الطريق الإقليمي: لحظة تهور ممكن تخلّي إنسان برئ مايرجعش بيته تاني

وكتبت الأوقاف عبر حسابها على موقع فيس بوك: فيه ناس كتير بتتعامل مع السواقة كأنها حرية مطلقة، يمشي بسرعة، يقطع الإشارة، يتجاوز في أي وقت، وكأن الطريق بتاعه لوحده، وبعضهم فاكر إن السرعة شطارة، وإن اللي بيسوق على مهله بيعطّل الدنيا، وفيه وسط الزحمة دي، بننسى إن لحظة تهور ممكن تخلّي إنسان برئ مايرجعش بيته تاني، وإن استعراض القوة على الطريق ممكن يكون سبب في مأساة عمر كامل.

وأضافت: ومن أكثر التصرفات الخطيرة اللي بنشوفها كل يوم، قطع الإشارة بحجة الإشارة فاضية، أو الطريق مافيش حد، أو مافيش ضابط واقف، وكأن الالتزام بالقانون اختيار، وناسيين إن مخالفة الإشارة مش بس مخالفة مرورية، دي جريمة ممكن تقتل نفس، وربنا سبحانه وتعالى قال: {وَلَا تُلْقُوا بِأَيْدِيكُمْ إِلَى التَّهْلُكَةِ}، وقال كمان: {وَلَا تَقْتُلُوا أَنفُسَكُمْ}، والنبي ﷺ علّمنا إننا نكفّ الأذى ونراعي الناس، وقال: "كلكم راعٍ وكلكم مسئول عن رعيته".

وواصلت وزارة الأوقاف: المشكلة الأكبر إن فيه مفاهيم غلط مترسخة: اللي يقول أنا سايق كويس ومليش دعوة بغيري، أو أنا حافظ الطريق، ويمسك الموبايل وهو سايق. وده ناتج عن غياب الوعي بأن الطريق مش مجرد مساحة بنمشي فيها، ده ميثاق أمان بيننا كلنا، وأي خرق ليه ممكن يكون تمنه غالي جدًا. والالتزام مش خوف من العقوبة، ده التزام أخلاقي وديني، واحترام لحياة الناس.

واختتمت: القيادة الآمنة مش ضعف، ولا التزامك بالقانون معناه إنك مش فاهم أو مش جريء. بالعكس، دي شجاعة حقيقية، ووعي، وتحضّر. خليك قدوة في سواقتك، وسُوق كأنك شايل أرواح على كتفك، لأنك فعلًا كده. حياتك مش ملكك لوحدك، وحياة غيرك أمانة في رقبتك. وربنا يحفظنا جميعًا، ويجعلنا من الناس اللي لما تمشي في الدنيا تخلّيها أأمن وأطهر.