الثلاثاء 10/يونيو/2025 - 01:42 ص

أضف للمفضلة

شارك شارك

تحدث إمام عاشور لاعب فريق الكرة الأول بالنادي الأهلي عن استعدادات الأحمر لبطولة كأس العالم للأندية 2025 قبل خوض افتتاح المونديال فجر يوم 15 يونيو المقبل ضد المستضيف فريق إنتر ميامي الأمريكي بقيادة ليونيل ميسي.

تصريحات إمام عاشور

وقال إمام عاشور في تصريحات تليفزيونية: كنت بقول لـ تريزيجيه إني من فترة بتفرج عليه في التليفزيون، وهو لاعب مؤثر وله لحظات خاصة مع منتخب مصر، وزيزو أخويا وعلاقتي به قوية، ومع بعض على طول، والشناوي أكثر شخص نصحني وفي الأول مكنتش بسمع أو كنت عادي لكن مؤخرًا بقيت بسمعله أوي لأني عارف أنه هيوجهني للصح.

وأضاف: دونجا أخويا وبكلمه لحد دلوقتي، واللي حصل ما بينا قبل كدة نرفزة ملعب لا أكثر ولا أقل، وأنا وشيكابالا أصحاب ومفيش حاجة بيني وبينه، وشيكابالا من الشخصيات الطيبة وقلبه أبيض.

وأشار إمام عاشور في تصريحاته: في الأول كنت بتوتر لما بلعب ماتش ديربي بين الأهلي والزمالك، وخدت الصدمة بدري مع الأبيض، عشان كدة مؤخرًا مبقتش متوتر من المباريات دي.

وأكد إمام عاشور في تصريحاته: الثقافة اتغيرت والموضوع بقا احتراف وعادي إن اللاعب ينتقل من الأهلي لـ الزمالك والعكس، وكل شيء وارد في كرة القدم، وبعيدًا عن أي شيء، الشخص يراعي ربنا في أكل عيشه ومخلص للنادي الذي يتواجد فيه، وأكيد مش هشوف حد بيتمنالي الخير وأنا هتمناله الشر، وطول منا مكمّل في النادي الأهلي عمري ما أبخل بنقطة عرق وهموّت نفسي لآخر لحظة.

وأردف: أسعد يوم في حياتي حينما توّجت بلقب دوري أبطال إفريقيا مع الأهلي، وأسوأ يوم حينما خسرت لقب السوبر الإفريقي من الزمالك لأنه كان لقاء صعب أن يمر بهذا السيناريو، وكنا على بُعد دقائق من الحصول على اللقب والسيناريو كان غريب.

وشدّد إمام عاشور: عادي جدًا نتوّج بكأس العالم للأندية، اي اللي هيوقفنا عشان منتوّجش باللقب؟ احنا لاعيبة وهما لاعيبة بردو، هما نجوم واحنا نجوم، والفارق هو الملعب، وهذا كلامي مع الأهلي ومنتخب مصر، ما المانع في تتويج الفراعنة بالمونديال؟، اي المشكلة إن أنا أحلم!.. أنا عندي هدف وحلم عايز أحققه وبتعب وربنا مُطلّع على تعبي، وأحلم بالتتويج بمونديال الأندية أصل احنا جايين أمريكا ليه طيب؟.

وأتم: صالحت حسام حسن، ومكنش فيه حاجة أو مشكلة أساسًا بل الإعلام المصري أخذ الأمور على مزاجه، وأنا تحت أمر المنتخب في أي وقت، وكان حلم من أحلامي أتدرب تحت يد حسام حسن، والعميد جالي بعد إصابتي في كتفي، وقالي هو مكسور؟ قولتله أيوة.. قالي خلاص بكرة تنزل معانا التمرين.