السبت 26/يوليو/2025 - 01:23 م

أضف للمفضلة

شارك شارك

علق أحمد حسن والد حسن ناشئ البنك الأهلي، بعد قرار النادي باستضافته في الاستراحة الخاصة عقب تداول صورته في قطار المنيا المتجه إلى القاهرة بشكل يومي لحضور التدريبات.

أول تعليق من والد ناشئ البنك الأهلي بعد تداول صورته في القطار

قال والد ناشئ البنك الأهلي في تصريحات خاصة لـ القاهرة 24: إحنا عايشين في المنيا وحسن بيحب الكرة، وبقاله 5 سنين بيعاني في السفر من المنيا إلى القاهرة يوميًا، من وقت ما كان لاعب في المقاولون العرب.

وتابع: حسن بيسافر لوحده للقاهرة علشان ظروف شغلي وأنا معايا 5 أطفال، وكل اللي بقدر عليه إني أشجعه وأقوله استحمل اللي عايز يوصل لحاجة لازم يتحدى الصعوبات.

وواصل: حسن لعب 3 سنوات أساسي في فريق الناشئين بالمقاولون العرب بعدها النادي استغنى عنه، وقوتها قالي إنه لازم يثبت نفسه، وخضع لاختبارات في أندية كتير منها الأهلي، لكن بعدها مضى في البنك الأهلي مع الكابتن بدر رجب.

وأضاف: النهاردة اتفاجأت بمكالمة تليفون من النادي وقرار توفير سكن ليه في الاستراحة، بصيت للسما وبكيت لإن حسن تعب وكان بينام على الأرض في القطر في الشتا، وبيتعب من الشمس في الصيف.

واختتم والد ناشئ البنك الأهلي تصريحاته: قولت مش هحكي عن معاناة حسن غير لما ربنا يكرمه ويوصل لحاجة، ووقت رحليه من المقاولون العرب قولتله ربنا شايلك الأفضل وحسن يستاهل دعم من كل الناس.

يذكر أن نادي البنك الأهلي برئاسة اللواء أشرف نصار، أكد في بيان رسمي إقامة اللاعب حسن أحمد باستراحة النادي وتسهيل جميع أموره، وذلك بعد تداول صورته في القطار خلال رحلته من المنيا إلى القاهرة لحضور التدريبات.