الجمعة 13/يونيو/2025 - 01:26 ص

أضف للمفضلة

شارك شارك

علق محمد هاني، لاعب النادي الأهلي، على انتقال أحمد السيد زيزو ومحمد علي بن رمضان ومحمود تريزيجيه للقلعة الحمراء خلال فترة الانتقالات الصيفية.

تصريحات محمد هاني
 

وقال محمد هاني، في تصريحات تليفزيونية: معظم الصفقات الجديدة مش غريبة علينا ولعبنا مع بعض في المنتخب، محمد علي بن رمضان إضافة كبيرة لفرقتنا، بقالنا كتير معندناش نفس المستوي ده من اللعيبه، أصبح عندنا فرقتين.

وأضاف: الصفقات السنة دي قادرة على المنافسة على كأس العالم للأندية، وخاصة جيلنا اللي قدر يحصل على 3 ميداليات في البطولة دي، جيلنا قدر ياخد حقه وكفاية، الناس وقت ما اتصعدت في الفريق الأول من 2014 قعدنا 7 سنين بنحاول ناخد إفريقيا.

وتابع: زيزو بقاله فترة مشاركش في ماتشات وده صعب جدا، لكنه شخصيته وعقليته بتاعت لاعب كورة محترف، بيتمرن ويشتغل على نفسه، هيندمج مع الفرقة بسرعة وعلاقته باللاعبين كويسة.

وعن انتقال زيزو إلى الأهلي، قال: مكنتش متوقع إنه ييجي الأهلي تمامًا، ولكن مبسوط طبعا بوجوده، ومن المميزات صعب تلاقيه معاه مشاكل مع جمهور الأهلي وهو في الزمالك مثلا.

وأكد: شيء صعب على المدرب إنه يتعامل مع كل النجوم دي، لكن الأهلي فيه سيستم إنه في الآخر فيه وجهه نظر مدرب.. هي اللي بتحسم مين يشارك ومين ميشاركش.

وواصل: تريزيجيه نجح بشكل كبير في أوروبا وساب أثر كبير في كل مكان لعب فيه بالخارج، وفي النهاية هو عاد لبيته.

وعن الفوز ببطولة الدوري الممتاز، قال:  أثقل شيء على لاعبي الفريق الخروج بموسم صفري بعد الخسارة من صن داونز في إفريقيا، وكنا مقررين لازم نكسب 6 ماتشات حتى لو بيراميدز كسب كل ماتشاته، نبقي عملنا اللي علينا.

وأردف: كنت متوقع الزمالك هيكسب بيراميدز في كأس مصر.. الكورة في مصر يعني أهلي وزمالك، وأتمني الزمالك يبقي في حته أفضل من كده.

واختتم تصريحاته بالحديث عن محمد صلاح وإمام عاشور، حيث قال: اللعب مع محمد صلاح كنز بالنسبة لي في مسيرتي، هو مختلف داخل وخارج الملعب، سابق الناس بعقليته وفكره في مصر وفي إنجلترا بالأخص، أما إمام عاشور فمفيش لاعب في مصر نفس مستواه، ومبسوط بانتهاء أزمته في منتخب مصر، لأنه يجب تواجده في بشكل أساسي لأنه مؤثر بالتأكيد فنيًا.